Сайн уу, За хэрвээ та намайг Youtube сувгаас маань анх харсан бол "Чим" гэдэг нэрээр маань мэдэх байх тийм ээ☺️.

Бүтэн нэр маань М.Хүрэлчимэг, одоо Италийн Үдинэ хотын их сургуулийн мастерийн зэргээр суралцаж байгаа төгсөх курсийн оюутан.

Хамгийн анх Италид сурахаар болсны дараа энэ улсын талаар мэдээлэл авах санаатай Youtube ортол энэ сэдвээр хийгдсэн контент маш цөөхөн байлаа. Арга ядаад нэг Энэтхэг охины бичлэгийг эргүүлж тойруулж үзсээр байгаад ойр зуурын мэдээлэлтэй болоод ирж байж билээ. Италидаа ирсэн хойноо ч мөн мэдэх судлах хийх зүйлс маш их. Тэр зуур зөвхөн би ч гэлтгүй, миний ойр тойрны оюутнууд ч мөн адил хангалттай мэдээлэлтэй байгаагүйн улмаас тэтгэлгээ хасуулах, визний асуудалд, торгуулах гэх мэт энгийн жижигхэн алдаанаас үүдсэн маш том асуудлуудтай нүүр тулгарч эхлэв.

Өөрийнхөө мэдсэн, сонссон, судалсан зүйлсээ шинээр ирж байгаа оюутнуудад хэлээд өгөх юмсан, Италид сурах ийм гоё боломж байдаг гэдгийг илүү олон хүүхдүүдэд таниулах юмсан, гадаадад тэтгэлэгтэй сурна гэдэг заавал боломжтой айлын, гавал толгойтой хүүхдүүдэд олддог боломж биш гэдгийг ойлгуулах юмсан гэдэг бодол дотроо чимээгүйхэн тээгээд мөрөөрөө амьдарч байтал гэнэтийн тохиолдлоор Youtube суваг нээчихдэг юм байна 😅.

За ингээд л "Chim in Italy" сувгаараа Италид сурч, амьдарч, аялаж байгаа бичлэгүүдээ оруулсаар, нөгөө дотроо бодоод яваад байсан "өөрийнхөө мэдсэнийг хуваалцах" хүслээ биелүүлж эхлэв. Өмнө хэлсэнчлэн Италид сурахтай холбоотой контент маш цөөхөн байдаг учраас энэ талаар бичлэг хийгээд эхэлмэгц энэ талаар сонирхсон хүмүүс чатаар, комментоор холбогдож асуулт асууж, зөвлөгөө авдаг болов.

Эхэндээ ч асуудалгүй сайхан хариулаад, амжихгүй бол дуут мессеж явуулаад хөөрхөн болоод байтал үзэгч нэмэгдэхийн хэрээр энэ сэдвээр сонирхож бичих хүмүүсийн тоо нь, асуултууд нь улам олширч би гэдэг хүн чат ирэх бүрт нэг л зайлсхийдэг болчихов.

Бөөн уншаагүй чат, мессежүүдээ харахаар цаанаа л нэг тухгүй, гэмтэй мэдрэмжтэй...өөрөө анхнаасаа энэ талаар хүмүүст таниулж эхэлчихээд уг нь хариу өгчихмөөр байдаг, гэтэл би өөрөө аль хэдийнээ халширчихсан байдаг...Ингээд байж байтал нэг санаа орж ирэв. - "За okay, би энэ хүмүүст, бүр өшөө ч олон хүмүүст өөрийнхөө сурч мэдсэнийг, туулсныг, хэрэгтэй мэдээллийг нь өгмөөр л байгаа юм чинь нэгдсэн байдлаар энэ мэдээллүүдээ нэгтгээд хүргэчихэе" гэж шийдэв. Ингээд ном, гарын авлага гэх мэт хэлбэрүүдийг туршиж үзээд хамгийн тохиромжтой хэлбэр нь онлайн сургалт болж таарав. Учир нь эдгээр мэдээллүүд үргэлж шинэчлэгдэж байх учиртай, бас би өөрөө цаашдаа агуулгыг нь баяжуулаад явах хүсэлтэй учраас.

За ийм замналаар энэхүү сургалт маань одоо танд хүрэхэд бэлэн болсон байгаа юм шүү. Нэг бүтээгдэхүүний үйлдвэртэй танилцсан юм шиг болсон уу? кк.

Угийн юм бүрийг детальчлан анхаардаг хүний хувьд энэхүү сургалтаа яг дотны найздаа зөвлөгөө өгч байгаагаар төсөөлөн - "За чи минь, аан уун гээд сонсож бай" гэж байгаа юм шигээр дотночлон, сэтгэлээсээ бичсэн юм шүү 😌🫶🏻

За ингээд сургалтанд минь тавтай морил ✨

Та гадаадад сурах мөрөөдөлдөө хүрэхэд хэдхэн алхам ойрхон байна, амжилт 😉🤞🏻